Fine anni Geminius, Celsus, Pompeius, equites
Romani, cecidere coniurationis crimine; ex quis Geminius
prodigentia opum ac mollitia vitae amicus Seiano, nihil ad
serium. et Iulius Celsus tribunus in vinclis laxatam catenam
et circumdatam in diversum tendens suam ipse cervicem perfregit. at Rubrio Fabato, tamquam desperatis rebus Romanis Parthorum ad misericordiam fugeret, custodes additi.
sane is repertus apud fretum Siciliae retractusque per centurionem nullas probabilis causas longinquae peregrinationis adferebat: mansit tamen incolumis oblivione magis
quam clementia.