Eodem anno duodecim celebres Asiae urbes conlapsae nocturno motu terrae, quo inprovisior graviorque
pestis fuit. neque solitum in tali casu effugium subveniebat in aperta prorumpendi, quia diductis terris hauriebantur. sedisse inmensos montis, visa in arduo quae plana
fuerint, effulsisse inter ruinam ignis memorant. asperrima
in Sardianos lues plurimum in eosdem misericordiae traxit: nam centies sestertium pollicitus Caesar, et quantum
aerario aut fisco pendebant in quinquennium remisit.
Magnetes a Sipylo proximi damno ac remedio habiti.
Temnios, Philadelphenos, Aegeatas, Apollonidenses, quique
Mosteni aut Macedones Hyrcani vocantur, et Hierocaesariam, Myrinam, Cymen, Tmolum levari idem in tempus
tributis mittique ex senatu placuit, qui praesentia spectaret
refoveretque. delectus est M. Ateius e praetoriis, ne consulari obtinente Asiam aemulatio inter pares et ex eo
impedimentum oreretur.